فى الوقت اللى فيه الزمالك بيتخبط وبيحاول يجيب بطوله بعد غياب البطولات عنه ل 3 سنين .... يحتفل الاهلى بمئويته الأولى و اللى سبقها انجازات كبيره على المستوى الأفريقى و العالمى ( ده لان المحلى مضمون كده كده ) بحصوله على دورى ابطال افريقيا و التأهل لكأس العالم للأنديه مرتين متتالتين وان كان قدم مستوى هزيل جدا فى الأولى ( غسيل ومكوه ) الا انه قدم مستوى رائع فى البطوله التانيه استحق بيه احترام العالم كله فى درس علمنا فيه الاستفاده من أخطاءنا
احتفاليه الأهلى فى حد ذاتها شرف لمصر كلها و للأهلاويه ودرس نتعلم منه التنظيم و حسن الاداره ... احتفاليه بدأت بكرنفالات لفت مصر كلها و راحت لجمهور الأهلى ف كل مكان فى مصر وندوات ثقافيه وأخيرا المباراه مع نجوم البارسا
المباراه كمان كان فيها من معانى الوفاء و العرفان بالجميل لكل من خدم النادى ... تكريم معنوى جميل ودرس لكل الناشئين ان النادى مش بينسى أولاده فى ظل زمن الاحتراف اللى الوفاء الاول فيه للفلوس و مين اللى يدفع اكتر
هوه ليه الأهلى كده .... ؟
الأهلى كده لانه اخد بأسباب النجاح :
اداره على درجه عاليه من الاحتراف و فهم البيزنس والتخطيط .
لعيبة عندهم طموح لا يقف عند حد معين عايزين يحققوا لنفسهم ولناديهم انجازات.
جهاز على مستوى فنى عالى.
جمهور بيساند فرقته .
الأهم من كل اسباب النجاح دى كلها انهم كلهم يبقوا موجودين ف وقت واحد مع بعض افتقاد أى عنصر منهم مع وجود التانيين مش هيحقق النتيجه المطلوبه
وده الفرق بين الأهلى و الزمالك ... الزمالك اوقات كتير بيمتلك اتنين أو تلاته من الاسباب دول و يفتقد الباقى و الدليل على كده فى الوقت الحالى .. اداره فاهمه و عاليه و معاها فلوس .. مدير فنى على مستوى عالى وجمهور بيساند فرقته لحد ما كان هيموت من الحسره بسبب اللاعبيه اللى معندهمش طموح و لا احساس بالمسؤوليه .
BUZZ SMS
جمهور الزمالك : كان الله ف عونك وربنا يصبركم على ما ابتلاكم
جمهور الأهلى : دول برده برشلونه يا جماعه متزعلوش
اداره الزمالك: ماشيين فى السكه الصح و جمهور الزمالك معاكم
اداره الأهلى : براااافوووووووو
لاعبى الزمالك: خلى عندكم شويه من الاحمر
لاعبى الاهلى : عارف شعوركم وانتاو بتلاعبوا البارسا .. ده كل واحد منهم كان بيحميه 3 بودى جارد وانتوا محدش بيسأل عنكم
لسان حال الحضرى بعد ماتش البارسا : هوه ده عيب الاعاده... تعليقا على ان الاعاده وضحت ان فيه جونين من بين رجله
زملكاوى
أحمد ... عاشق الروح |
هو في ايه
ليه اللون هنا مش محايد
ياريت يبقى ابيض المره الجيه
والزمالك اكيد كويس بس
المشكله ديما في الاداره
والحمدالله مرتضى اتسجن 3 سنين
خلى النادي يفوق
بخصوص الاهلي مش عارفه اقول ايه
في حاجه بجد ضحكتني قبل الماتش رانيا علواني عماله تقول لو مكناش عرفين ان الاهلي قد برشلونه مكناش جبناه
احنا هنكسب ان شاء الله
وكمان المعلق كان عنده كميه تفاؤل غير طبيعه في اول10 دقائق الاهلي هيكسب ده ناي بطوله ياجماعه
انتم نسين عمل ايه في ريال مدريد
الشوط التاني قلب180 درجه
قال ايه انتم فكرين اننا جيبنهم علشان نكسبهم لالا طبعا
احنا جيبنهم علشان نستمتع بالكوره النظيفه
دول برشلونه برضه
كان نفسي اسئله وانته مكنتش عارف من الاول ولا
كنت فكرهم بيلعبو مع الاسماعيلي
ولا بلاش السيره ديه
:)
تحياتي