في فبراير 2003حصل حدث كبير عمل صدي في الاوساط الرياضية وهو قيام الاتحاد الدولي للإحصاء باختيار نادي الزمالك كأفضل نادي في العالم خلال شهر فبراير بسبب انجازاته المحلية وانتصاراته وحصوله علي كاس السوبرالافريقي بعد عرض راقي أمام الوداد البيضاوي3\1،وطبعا انتشرت فرحة كبيرة في الاوساط الزمالكاوية بسبب الانجاز الرائع ده وفي المقابل كانت الجريدة الرسمية للنادي الأهلي خارجة بعنوان ساخر جدا وهو نادي حرس الحدود الأول علي العالم يوم الخميس الساعة ستة بعد وزه علي الترسانة بنصف دستة أهداف
وطبعا محتوي المقال سخرية من فرحة الزمالكاوية علي أساس ان الكورة كانت متوقفة في أغلب أنحاء اوروبا في الشهر ده بسبب موسم الجليد وكلام عن إن الاتحاد الدولي للإحصاء مش رسمي وميتبعش الفيفا بأي شكل من الأشكال والله يرحم بيبو وبشير بيبو والجون وإن كنت ناسي أفكرك والكلام ده وعلي بلاطة كده تفهم إن موضوع الزمالك ده كفتة ع الاخر
المهم تمر الأيام وبعد حوالي تلات سنين وفي فبراير 2007 وفي التصنيف العام للاتحاد الدولي للاحصاء برضه الأهلي طلع في المركز 22 علي العالم متفوق علي عمالقة كتير في القارة الاوروبية زي ريال مدريد وبايرن ميونخ وبورتو البرتغالي وطبعا كان فيه موجة تهليل وفرحة مالهاش حد من المواقع والصحف الخاصة بالنادي الأهلي وكلام عن العالمية اللي وصلها النادي وأسماء الاندية اللي الأهلي سبقهم في التصنيف وانجاز بقي
وأما تاخدك عينك علي الزمالكاوية والاسماعلاوية تلاقي رد الفعل سخرية وضحك وتريقة علي فرحة الاهلاوية وكلام برضه عن عدم شرعية الاتحاد الدولي للإحصاء وبرضه شوية تحابيش وفلاش باك لمتش التلاتة صفر بتاع الاسماعيلي وأوصاف من نوعية القرود والنادي الجهلي والأحمر فتحس إن الاهلي ده كله علي بعضة كفتة برضه
وبعد شهر وفي تصنيف شهر مارس نشر موقع الاسماعيلي خبر عن دخول الاسماعيلي ضمن أفضل 350 نادي علي العالم في التصنيف العام وطبعا كلام بفرحة عن الخبر وأمنيات باستكمال خطوات الوصول للعالمية
وأما تبص للكام مشهد دول تلاقي إن الناس دول بيبصوا في مراية إزازها شفاف ماهو التصنيف هو نفسه التصنيف والجهة اللي مطلعاه هي نفسها الجهة وكل طرف من الأطراف دول جاله يوم وسخر من التصنيف هو واللي مطلعه زي ماجاله يوم كان هاين عليه يطلب عمل عطلة رسمية ليوم خروج التصنيف
طبعا الفكرة مش في موضوع التصنيف في حد ذاته ،إنما الفكرة في اعلام أعمى متحيز بشكل مستفز
اعلام أحمر يتكلم عن المباديء والأخلاق وحرمات البيوت اللي بتنتهك من واقعة إبراهيم سعيد الشهيرة مع أحمد عبد الحكم لاعب المنصورة وييجى ينسى الاخلاق والمباديء دي ويبرر الظروف والاستفزاز وأخطاء التحكيم اللي دفعت جوزيه إنه يقلع مرة ويدرع مرة تانية
وإعلام أبيض يتكلم عن الوطنية والأخلاق ساعة أما مشجع أهلاوي خرج في برنامج قال إنه كان بيشجع أهلي جدة ضد الزمالك وينسي أعلام الصفاقس اللي رفعها الزمالكاوية قبل متش الاهلي ضد الصفاقس
وأمثلة كتير أوي من الإعلام الأهلاوي والزمالكاوي وحتي الاسماعلاوي......تحس وأنت بتشوف المشاهد دي إنك بتابع ظاهرة جديدة أو فيلم خيال علمي
فيلم فيه موقف ممكن يكون تقييمه سلبي من شخص أو جهة معينة وفجأة تلاقي نفس الموقف بحزافيرة ومن نفس الشخص خارج بتقييم تاني خالص لمجرد إنه يخص جهة منافسة
بجد حاجة تحير
رسايل أوف لاين
*************
موقع الأهلي......بجد موقف رائع جدا إنكم تكتبوا عن تمنايتكم بالشفاء لعبد الواحد بس يارب تكون النية خالصة
جريدة الزمالك......كان فيه جريدة وصفت فوزها علي فريق بهزمنا العلوج هو ده مش ضد المباديء برضه ولا المفتي قال يجوز
إيه أر تي.........بعد مالدوري الإنجليزي طار وحصل الايطالي والأسباني والألماني فاحنا بنؤيد رأيكم بإن الكورة للى يدفع بس
إدارة الأهلي والزمالك......ياريت تكتبوا علي مواقعكم وجرايدكم للكبار فقط وخطر علي مرضي الضغط
ميدو.......لأ فعلا لقطتك مع لاعب الإعلاميين تثبت إنه مكنش قصدك قول حسبي الله ونعم الوكيل فيه
عبد المنصف.......هو نادي لاتسيو مكنش يعرف إنه عنده 3 لعيبة من بره الاتحاد الاوروبي قبل مايجيبك للاختبار؟ فتوح .. مستكنيص |
تناولك للموضوع جميل جرابس علي فكرة انا شامم ريحة تحيز للاهلي يا تري مين المحرر الاهلاوي ده
مؤمن